Khutbah Jum'at Bahasa Jawa : MANAGES MAKNA BAROKAH

Khutbah Jum'at Bahasa Jawa :

MANAGES MAKNA BAROKAH

-=(09/6/2018)=-

اَلسَّلاَمُ عَلَيْكُمْ وَرَحْمَةُ اللهِ وَبَركَاتُهُ

إِنَّ الْحَمْدَ لِلَّهِ نَحْمَدُهُ وَنَسْتَعِيْنُهُ وَنَسْتَغْفِرُهُ, وَنَعُوْذُ بِاللهِ مِنْ شُرُوْرِ اَنْفُسِنَا وَسَيِّئَاتِ أَعْمَالِنَا, مَنْ يَهْدِ اللهُ فَلاَ مُضِلَّ لَهُ, وَمَنْ يُضْلِلْ فَلاَ هَادِيَ لَهُ. أَشْهَدُ أَنْ لاَ إِلَهَ إِلاَّ اللهُ وَحْدَهُ لاَ شَرِيْكَ لَهُ, وَأَشْهَدُ َأَنَّ مُحَمَّدًا عَبْدُهُ وَرَسُوْلُهُ.  اَللَّهُمَّ صَلِّ وَسَلِّمْ عَلَى مُحَمَّدٍ وَعَلَى اَلِهِ وَأَصْحابِهِ وَمَنْ وَالاَهُ, وَمَنْ تَبِعَهُمْ بِإحْسَانٍ اِلَى يَوْمِ الْقِيَامَةِ. يَآَيُّهَا الَّذِيْنَ أَمَنُوْا اتَّقُوْا اللهَ حَقَّ تُقَاتِهِ وَلاَ تَمُوْتُنَّ إِلاَّ وَأَنْتُمْ مُسْلِمُوْن. يَآيُّهَا النَّاسُ اتَّقُوْا رَبَّكُمُ الَّذِيْ خَلَقَكُمْ مِّنْ نَفْسٍ وَاحِدَةٍ وَخَلَقَ مِنْهَا زَوْجَهَا وَبَثَّ مِنْهُمَا رِجَالاً كَثِيْرًا وَنِسَآءً وَاتَّقُوْا اللهَ الَّذِيْ تَسَآءَلُوْنَ بِهِ وَاْلأَرْحَامَ إِنَّ اللهَ كَانَ عَلَيْكُمْ رَقِيْبًا. يَآيُّهَا الَّذِيْنَ ءَامَنُوْا اتَّقُوْأ اللهَ وَقُوْلُوْا قَوْلاً سَدِيْدًا, يُصْلِحْ لَكُمْ أَعْمَالَكُمْ وَيَغْفِرْلَكُمْ ذُنُوْبَكُمْ وَمَنْ يُطِعِ اللهَ وَرَسُوُلَهُ فَقَدْ فَازَ فَوْزًا عَظِيْمًا.

فَإِنَّ أَصْدَقَ الْحَدِيْثِ كِتَابُ اللهِ وَخَيْرَ الْهَدْيِ هَدْيُ مُحَمَّدٍ صَلَى اللهُ عَلَيْهِ وَسَلَّمَ وَشَرَّ اْلأُمُوْرِ مُحْدَثَاتُهَا وَكُلُّ مُحْدَثَةٍ بِدْعَةٌ وَكُلُّ بِدْعَةٍ ضَلاَلَةٌ وَكُلُّ ضَلاَلَةٍ فِيْ النَّارِ.

Hadirin Jama’ah Jum’ah rahimakumullah,

Sadaya puji namung kagunganipun Allah Subhanahu wa Ta’ala piyambak. Inggih Allah punika Dzat ingkang nguwaosi sadaya alam. Inggih Allah punika Dzat ingkang Maha Welas lan Maha Asih. Ingkang maringi rizki dhumateng tiyang ingkang sami ngabekti, paring sandhang (wastra) lan pangan (boga) dhumateng tiyang ingkang tansah ngumawula.

Sumangga kita hambudidaya nambahi iman lan taqwa kita dhumateng Allah Subhanahu wa Ta’ala wonten ing sadhéngah papan pundi kémawon lan wekdal punapa kémawon, mugi-mugi gesang kita tansah pinaringan karaharjan ing alam donya lan alam akhirat.

Shalawat lan salam mugi tansah dipunparingaken dhumateng junjungan kita, panutan kita, nabi lan rasul pungkasan; Muhammad salallahu ‘alaihi wa salam, sumrambah dhumateng para kulawarga, shahabat, lan para tiyang ingkang tansah manut lan mituhu dhumateng panjenenganipun. Amin.

Hadirin jama’ah Jum’ah rahimakumullah,

Sadaya tiyang kepingin barokah ing samudayanipun. Barokah gesangipun, barokah umuripun, barokah rizki lan bandhanipun, barokah ilmunipun, lan sapanunggalanipun.

Barokah punika tambahipun ketha’atan satunggalipun tiyang dhumateng Allah Subhanahu wa Ta’la kanthi kawontenan ingkang kados punapa kémawon. Bungah lan susah, jembar lan rupeg rizkinipun tetep tha’at dhumateng Allah Subhanahu wa Ta’ala, lan malah kapara tambah tha’atipun dhumateng Allah Subhanahu wa Ta’ala.

Hadirin jama’ah Jum’ah rahimakumullah,

Gesang barokah boten namung séhat, hananging ugi sakit punika inggih barokah. Kados sakitipun Nabi Ayub ‘alaihi salam, sakitipun ndadosaken tambah tha’atipun dhumateng Allah Subhanahu wa Ta’ala. Umur barokah, boten mesthi dawa umuripun. Wonten ingkang cendhak umuripun, nanging tha’at dhumateng Allah Subhanahu wa Ta’ala saged ngukir sejarah, dipunkenang déning generasi sapungkuripun. Kados umpaminipun  KH Ahmad Dahlan, umuripun 55 (sѐket gansal) tahun. Lahir 01 Agustus 1868, seda 23 Pebruari 1923, Panjenenganipun dipunkenang dados sejarah, minangka Pahlawan Nasioanal. Sépak terjangipun dipuntuladha déning para umat sapungkuripun.

Hadirin jama’ah Jum’ah rahimakumullah,

Ilmu barokah, boten amargi kathahipun seratan / tulisan / karangan / skripsi / makalah / lan desertasi, hananging ilmu ingkang saged dipundadosaken tiyang nѐtѐsaken  kringet lan rahipun anggѐnipun ngamal lan merjuwangaken agaminipun Allah Subhanahu wa Ta’ala.

Gaji barokah, boten gaji / upahipun ingkang ageng, hananging gaji / upah ingkang hanjalari marginipun rizki tumrap tiyang sanѐs lan samsaya kathah tiyang ingkang kabantu kanthi gaji / upah kasebat.

Hadirin jama’ah Jum’ah rahimakumullah,

Tanah / pasitѐn / sawah barokah.    Pasitѐn barokah punika boten jalaran subur lan éndah panoramanipun, jalaran tanah / pasitѐn / sawah / ingkang ngaré / tandhus kados Mekkah hanggadhahi kautamѐn ingkang agung ing ngarsanipun Allah Ta’ala. Tiyang Mekah gesang makmur, jalaran tanah pasitѐn  ingkang barokah.

Dhaharan barokah. Dhaharan barokah punika ingkang komposisi gizinipun jangkep; 4 séhat 5 sampurna, hananging dhaharan ingkang saged handadosaken tiyang ingkang dhahar tambah tha’atipun dhumateng Allah Subhanahu wa Ta’ala sasampunipun dhahar.

Hadirin jama’ah Jum’ah rahimakumullah,

Putra / anak barokah. Putra / anak barokah punika boten putra / anak ingkang lucu nalika alitipun, suksѐs pangkat lan jabatanipun inggil, hananging putra barokah punika ingkang tha’at dhumateng Allah Subhanahu wa Ta’ala, langkung shalih katinimbang tiyang sepuhipun, lan boten pedhot-pedhot anggѐnipun dongakaken dhateng tiyang sepuhipun.

Wulan Ramadhan barokah, tegesipun Wulan Ramadhan ingkang saged handadosaken kita tambah tha’at lan tambah ngamal kasahénan kita katimbang wulan-wulan sanѐsipun.

Hadirin jama’ah Jum’ah rahimakumullah,

Mugi-mugi kita tansah dipunparingi pitulungan, lan kekiyatan, tambah syukur dhateng Allah Subhanahu wa Ta’ala.

Manawi tiyang punika tansah syukur,  iman lan taqwa dhumateng Allah Subhanahu wa Ta’ala, pramila Allah Ta’ala badhé paring barokah sadaya wulu pametu saking langit lan bumi. Kados janjinipun Allah Subhanahu wa Ta’ala kasebat wonten ing Al-Qur’an Surat Al-A’rof [7] ayat 96 makaten:

وَلَوْ أَنَّ أَهْلَ الْقُرَىٰ آمَنُوا وَاتَّقَوْا لَفَتَحْنَا عَلَيْهِمْ بَرَكَاتٍ مِنَ السَّمَاءِ وَالْأَرْضِ وَلَٰكِنْ كَذَّبُوا فَأَخَذْنَاهُمْ بِمَا كَانُوا يَكْسِبُونَ

Tegesipun: “Menawa sekirané para pendhudhuké negara-negara padha iman lan taqwa, wus mesthi Ingsun bakal nurunaké marang dhѐwѐké mau berkah sangka langit lan bumi, hananging dhѐwѐké padha hanggorohaké (marang ayat-ayat Ingsun) kuwi akhiré Ingsun siksa wong-wong mau amarga lelakoné dhѐwѐké”. (QS. Al-A’rof [7]:96).

Hadirin jama’ah Jum’ah rahimakumullah,

Makaten tegesipun BAROKAH. Boten kathahipun barang, hananging manfa’at lan ginanipun barang punika handadosken tambahing tha’atipun tiyang dhateng Allah Subhanahu wa Ta’ala.

Sedaya tiyang mesthi kepingin barokah ing sadayanipun. Barokah rizki lan bandhanipun, barokah gajinipun, barokah ilmunipun, barokah umuripun, lan sanѐs-sanѐsipun.

Mugi Allah Subhanahu wa Ta’ala paring barokah dhateng sedaya nikmat ingkang dipunparingaken dhumateng kita, saged nambah tha’at kita dhumateng Allah Ta’ala. Hanjalari gesang kita begja mulya ing donya lan ing akhirat.

Amin Yaa Rabbal ‘Alamin.

أَقُوْلُ قَوْلِيْ هَذَا وَأَسْتَغْفِرُ اللهَ الْعَظِيْمَ, لِيْ وَلَكُمْ وَلِسَائِرِ الْمُسْلِمِيْنَ وَالْمُسْلِمَاتِ مِنْ كُلِّ ذَنْبٍ فَاسْتَغْفِرُوْهُ, إِنَّهُ هُوَ الْغَفُوْرُ الرَّحِيْمُ.

-=(hms, 041018, 13.26)=-

Khutbah Jum'at Bahasa Jawa : AMRIH IMAN TAMBAH

Khutbah Jum'at Bahasa Jawa :

AMRIH IMAN TAMBAH

-(08/6/2018)=-

اَلسَّلاَمُ عَلَيْكُمْ وَرَحْمَةُ اللهِ وَبَركَاتُهُ

اَلْحَمْدُ لِلَّهِ الّذِيْ خَلَقَ الْمّوْتَ وَالْحَيَوةَ لِيَبْلَوَكُمْ اَيُّكُمْ اَحْسَنُ عَمَلاً. . أَشْهَدُ أَنْ لاَ إِلَهَ إِلاَّ اللهُ وَحْدَهُ لاَ شَريْكَ لَهُ, وَأَشْهَدُ أَنَّ مُحَمَّدًا عَبْدُهُ وَرَسُوْلُهُ لاَنَبِيَّ بَعَدَهُ. اَللَّهُمَّ صَلِّ وَسَلِّمْ وَباَرِكْ عَلَى رَسُوْلِ اللهِ, نَبِيِّنَا مُحَمَّدِ بْنِ عَبْدِ اللهِ, وَعَلَى اَلِهِ وَصَحْبِهِ وَمَنْ وَالاَهُ, وَمَنْ تَبِعَهُمْ بِإِحْسَانٍ إِلَى يَوْمِ الْقِيَامَةِ. أَمَّا بَعْدُ:  فَيَا عِبَادَ اللهِ, أُوْصِيْ بِنَفْسِيْ وَإِيَّكُمْ بِتَقْوَى اللهِ تُقَاتِهِ,  فَقَدْ فَازَ الْمُتَّقُوْنَ. قَالَ اللهُ تَعَالَى فِيْ الْقُرْأَنِ الْكَرِيْمِ: يَآَيُّهَا الَّذِيْنَ أَمَنُوْا اتَّقُوْا اللهَ حَقَّ تُقَاتِهِ وَلاَ تَمُوْتُنَّ إِلاَّ وَأَنْتُمْ مُسْلِمُوْن.

Jama’ah sidang Jum’ah ingkang dipunmulyakaken Allah Subhanahu wa Ta’ala.

Sadaya puji namung kagunganipun Allah piyambak. Inggih Allah punika Dzat ingkang handadosaken pejah lan gesang, amrih Allah Hamirsani sintena tiyang ingkang langkung sahé ngamalipun.

Shalawat lan salam mugi tansah kapiraken dhumateng Junjungan kita Nabi Agung Muhammad shallallahu ‘alaihi wa sallam, sumrambah dhumateng para kulawarga, para shahabat, lan para tiyang ingkang tansah handhѐrѐk dhawuh-dhawuhipun ngantos bénjang dinten qiyamah.

Kula minangka khatib ing dinten Jum’ah siyang punika, keparenga kula ngajak dhumteng awak kula piyambak ugi dhumateng panjenengan sadaya, sumangga kita hambudidaya iman lan taqwa saged ngrembaka, amrih gesang kita tansah pinaringan widada mulya ing alam donya lan alam akhirat mangké.

Jama’ah sidang Jum’ah ingkang dipunmulyakaken Allah Subhanahu wa Ta’ala.

Iman punika mujudaken bandha ingkang baku tumrap tiyang Islam. Gesang tanpa iman namung badhé nambah sengsara. Pejah mbeta iman badhé gesang mulya wonten ing Suwarga.

Iman dhateng Allah Subhanahu wa Ta’ala badhé handadosaken gesangipun tiyang sregeb lan semangat, jalaran piyambakipun yakin bilih manawi tumindak kesahénan Allah Ta’ala badhé paring pangalembana ingkang matikel-tikel.

Piyambakipun yakin bilih kanikmatan ing Suwarga punika boten wonten amput-amputipun manawi kabandhing kaliyan kanikmatan ing donya. Pramila tiyang  lajeng hambudidaya amrih saged dipunlebetaken dhateng Suwarga.

Jama’ah sidang Jum’ah ingkang dipunmulyakaken Allah Subhanahu wa Ta’ala.

Manawi iman punika tambah, pramila sikap optimisipun badhé tambah, keihlasaipun tambah, kejujuranipun tambah, mantepipun manah tambah (tambah percaya dhiri), keuletanipun tambah, kabegjanipun inggih badhé tambah.

Makaten salengipun manawi iman punika tambah, pramila badhé tambah sedaya sifat lan amal ingkang sahé, makaten ugi nikmat ingkang badhé  dipunpikolih inggih badhé tambah.

Jama’ah sidang Jum’ah ingkang dipunmulyakaken Allah Subhanahu wa Ta’ala.

Wonten cara amrih iman punika saged tambah, ing antawisipun inggih punika:

o   Nambah Kuwalitas Ibadah Mahdhah Lan Kuwalitas Saha Kuwantitas Ibadah Ghairu Mahdhah.

Jama’ah Jum’ah ingkang minulya, Ibadah mahdhah umpaminipun shalat fadhu 5 (gangsal) wekdal boten saged dipumtambah, shalat Shubuh 2 (kalih) raka’at boten saged dipuntambah dados 3 (tigang) raka’at, hananging kuwalitasipun shalat Shubuh saged dipuntambah umpaminipun tambah khusyu’ lan tuma’ninah.

Shalat Ghairu mahdhah saged dipuntambah kuwantitasipun saha kuwalitasipun, kados nindakaken shalat Sunnah Rawatib katambah shalat Sunnah Dhuha. Shalat Sunnah Rawatib lan shalat Sunnah Dhuha katambah kuwalitasipun, tambah khusyu’ lan tambah tuma’ninah.

Gegayutan nambah kuwalitas lan kuwantitas punika kita kedah hameksa dhiri, jalaran sadaya punika manawi dѐrѐng kalampahan raosipun awrat lan aras-arasen. Pramila kedah meksa awak manawi badhé hamiwiti.

o   Maos Lan Tadabur Al-Qur’an.

Al-Qur’an minangka tuntunan tumrap panggesanganing tiyang kedah kita waos lan sinahu, amrih mangertos lan paham isi suraosipun (tadabur).

Kanthi makaten tiyang badhé tawadhu’ dhateng Allah Subhanahu wa Ta’ala lan dhateng sesami ngagesang. Tiyang boten badhé kataman sifat ujub lan ghumedhé (sombong).

Kanthi maos lan tadabur Al-Qur’an, tiyang imanipun badhé tambah kiyat, jalaran tiyang kepanggih bebener ingkang hakiki, janji-janji Allah Ta’ala ingkang nyata, pawartos ingkang nentremaken manah. Sadaya dados bukti Maha Kuwaosipun Allah Subhanahu wa Ta’ala.

o   Dzikir Lan Tafakur Dhateng Allah Subhanahu Wa Ta’ala.

Dzikir punika boten namung manawi bibar nindakakekn shalat, hananging wonten ing saben wekdal lan papan pundi kémawon kedah tansah dzikir dhumateng Allah Ta’ala.

Wekdal nyambut damel, rékréasi, badhé tilem lan nalika wungu tilem, nalika badhé dhahar lan nalika dhahar sampun rampung dzikir dhumateng Allah Ta’ala. Sadaya aktifitas tansah dzikir dhumateng Allah Subhanahu wa Ta’ala.

Tafakur tegesipun ngangen-angen. Sadaya perkawis ingang kaweca ing kitab Al-Qur’an lan ngangen-angen kawotenan ingkang wonten ing jagad raya (ayat kauniyah) punika dadosaken iman badhé ngremboko. Kanthi dzikir lan tafakur sadaya titahipun Allah Ta’ala kanthi bener badhé pikantuk dudutan (hasil) ingkang sami.

o   Kumpul Kaliyan Tiyang Ingkang Shalih.

Kuwalitas gesang kita punika jamak limrahipun kathah jalaran pangaribawa (pengaruh) saking kawontenanan lingkngan kanan kéréngipun.

Tiyang badhé sregeb ngibadah shalat, manawi kanca lan mitranipun sregeb ngibadah. Tiyang badhé lingsem tumindak awon, manawi kanca lan para mitranipun sahé tumindakipun.

Jama’ah sidang Jum’ah ingkang dipunmulyakaken Allah Subhanahu wa Ta’ala.

Wonten sanépan makaten; Kakancan kaliyan BAKUL minyak wangi badhé dhѐrѐk wangi gandanipun sanajan boten tumbas minyak wangi, lan badhé dhѐrѐk ganda apek lan saged ugi badhé kacipratan latu manawi cedhak-cedhak tukang PANDAI wesi.

Kados makaten punika pangaribawanipun tiyang kekancan. Pramila pancѐn ageng sanget pangaribawanipun. Lan poma dipoma kita kedah waspada manawi kita pados réncang punika. Boten angger kémawon kekancan punika.

Jama’ah sidang Jum’ah ingkang dipunmulyakaken Allah Subhanahu wa Ta’ala.

Makaten sawatawis cara kita amrih iman saged tambah lan ngrembaka.

Ingih punika kita kedah  nambah kuwalitas ibadah mahdhah lan nambah kuwalitas saha kuwantitas ngibadah ghairu mahdhah, maos lan tadabur Al-Qur’an, Dzikir lan tafakur dhateng Allah Ta’ala, kumpul kaliyan tiyang ingkang shalih.

Manawi kita saged mujudaken perkawis punika, insya Allah iman kita badhé langgeng. Iman ingkang [anggeng badhé hanjalari gesanging manungsa widada mulya wiwit gesang ing ngalam donya ngantos gesang ing akhirat.

Gesang ing donya kanthi ayem tentrem, gesang ing akhirat pikantuk pangalembana awujud Suwarga Loka. Gesang ayem tentrem salaminya.

Jama’ah sidang Jum’ah ingkang dipunmulyakaken Allah Subhanahu wa Ta’ala.

Sumangga kita hanyenyuwun pangreksa dhumateng ngarsanipun Allah Subhanahu wa Ta’ala, mugi kersa paring pitulungan dhumateng kita sowan dhumateng ngarsanipun kanthi bekta Iman, Islam, Ihsan ingkang jejeg.

Aamin Yaa Rabbal ‘Aalamin.

أَقُوْلُ قَوْلِيْ هَذَا وَأَسْتَغْفِرُ اللهَ الْعَظِيْمَ, لِيْ وَلَكُمْ وَلِسَائِرِ الْمُسْلِمِيْنَ وَالْمُسْلِمَاتِ مِنْ كُلِّ ذَنْبٍ فَاسْتَغْفِرُوْهُ, إِنَّهُ هُوَ الْغَفُوْرُ الرَّحِيْمُ.

-=(hms, 290918, 11.11)=-