DONYA KULA KANGGÉ AKHIRAT KULA

السلام عليكم ورحمة الله وبركاته

اَلْحَمْدُ لِلَّهِ  الَّذِيْ هَدَانَا لِهَذَا وَمَا كُنَّا لِنَهْتَدَيَ لَوْلاَ أَنْ هَدَانَا اللهُ. أَشْهَدُ أَنْ لاَ إِلَهَ إِلاَّ اللهُ وَحْدَهُ لاَ شَريْكَ لَهُ, وَأَشْهَدُ أَنَّ مُحَمَّدًا عَبْدُهُ وَرَسُوْلُهُ لاَنَبِيَّ بَعَدَهُ. اَللَّهُمَّ صَلِّ وَسَلِّمْ وَباَرِكْ عَلَى نَبِيِّنَا مُحَمَّدٍ وَعَلَى اَلِهِ وَصَحْبِهِ وَمَنْ وَالاَهُ, وَمَنْ تَبِعَهُمْ بِإِحْسَانٍ إِلَى يَوْمِ الْقِيَامَةِ. أَمَّا بَعْدُ:  فَيَا عِبَادَ اللهِ أُصِيْكُمْ وَنَفْسِيْ بِتَقْوَى اللهِ فَقَدْ فَازَ الْمُتَّقُوْنَ. قَالَ اللهُ تَعَالَى فِيْ الْقُرْأَنِ الْكَرِيْمِ: يَآَيُّهَا الَّذِيْنَ أَمَنُوْا اتَّقُوْا اللهَ حَقَّ تُقَاتِهِ وَلاَ تَمُوْتُنَّ إِلاَّ وَأَنْتُمْ مُسْلِمُوْن.

Hadirin Jama’ah Jum’ah rahimakumullah,

Sumangga kula dhèrèkaken sesarengan ngaturaken puji lan syukur dhumateng ngarsanipun Allah Subhanahu wa Ta’ala ingkang sampun maringi nikmat lan rahmat dhumateng kita sadaya, sahingga kita ing wekdal punika  saged kempal manunggal wonten ing  Baitullah punika  kanggé nindakaken shalat Jama’ah Jum’ah.

Kalebet wujud syukur kita dhumateng Allah Subhanahu wa Ta’ala punika sumangga kita nambahi kualitas iman lan taqwa kita dhumateng Allah Subhanahu wa Ta’ala kanthi taqwa ingkang saleres-leresipun wonten ing sadhéngah papan lan kawontenan punapa kémawon.

Salajengipun sumangga kita handedonga dhumateng Allah Subhanahu wa Ta’ala , mugi-mugi shalawat lan salam tansah dipunparingaken  dhumateng junjungan kita Nabi agung Muhammad shalallahu ‘alaihi wassalam ingkang sadaya tindak tandukipun dados tuladha tumrap kita.

Hadirin  jama’ah Jum’ah ingkang tansah dipunmulyakaken Allah SwT.

Samangké punika taksih kathah tiyang ingkang boten nyadhari lan boten hanggadhahi pétangan. Hanelasaken bandhanipun kanggé foya-foya, boten béntenaken malih antawisipun kabetahan lan kapénginan. Ingkang dipunutamèkaken hanamung tata dhahiripun kémawon, kapéngin katingal kerèn, lan katingal wah!. Sanajan wonten ing sakiwa tengenipun kathah tiyang-tiyang ingkang kaluwèn lan sarwa kacingkrangan.

Hadirin  jama’ah Jum’ah ingkang tansah dipunmulyakaken Allah SwT.

Sanajan ing sedya ingkang kawitan tiyang ingkang hanggadhahi gaya panggesangan ingkang sarwa méwah punika kepéngin dipunpuji lan pikantuk pangalembana saking tiyang kathah, hananging èstunipun badhé nemahi kabencian lan kasangsaran, kacemburuan sosial lan kadhendhaman. Allah Subhanahu wa Ta’ala ugi boten remen dhumateng tiyang-tiyang ingkang gumedhé lan tiyang ingkang pamèr.

Hadirin  jama’ah Jum’ah ingkang tansah dipunmulyakaken Allah SwT.

Kalepatanipun tiyang kasebat kalawau boten amargi piyambakipun punika dipuntaqdiraken sugih lan sarwa wonten. Lan ugi boten ugi kasinungan  bandha-bandhu. Hananging kalepatanipun punika amargi piyambakipun boten saged ngatur lan hangelola bandhanipun. Manawi anggènipun ngatur lan hangelola punika jumbuh kaliyan ingkang dipunkersakaken ingkang Maha Maringi inggih Allah Subhanahu wa Ta’ala, pramila badhé pikantuk kabegjan lan kamulyan. Pramila boten badhé wonten bandha ingkang muspra, manawi sadaya kita atur lan kita kelola kanggé akhirat kita, lan ugi kita tilaraken punapa kémawon ingkang boten wonten gina lan manfaatipun. Lan inggih punika ingkang kawastanan zuhud.

Hadirin  jama’ah Jum’ah ingkang tansah dipunmulyakaken Allah SwT.

Zuhud punika boten sami kaliyan manawi ngagem ageman sarwa compang-camping, griya réyat-réyot, miskin boten hanggadhahi pakaryan lan pandamelan ingkang gumathok.

Tiyang sugih punika saged gesang kanthi zuhud, manawi sadaya bandhanipun dipun-ginakaken kanggé akhératipun.

Hadirin  jama’ah Jum’ah ingkang tansah dipunmulyakaken Allah SwT.

Hubbud dunya (trisna kadunyan) punika handadosaken donya minangka dados tujuan. Tumindak punika kalebet satunggalipun kalepatan lan kasengsaran. Awit kajawi badhé hanyiksa raga, nguras energy, pramila ibadhahipun ugi badhé katalumpén.

Dèrèng malih ingkang pejah manahipun,  badhé handadosaken tiyang ingkang mabuk kadonyan punika  badhé tegel dhateng sasami ngagesang, angas lan buas lir kadya kéwan serigala ingkang nandhang kaluwèn.

Yahya bin Mu’adz ngendika: “ La kapriyé aku ora seneng marang bandha donya, kamangka ing kono aku bisa mangan lan handadèkaké aku bisa urip, lan aku bisa tumindak tha’at lan kanthi iku uga aku bisa antuk suwarga”.

Pramila kalebet pinter lan cerdhas sanget, jalaran donya ingkang rèmèh lan fana, piyambakipun saged hanyadé kanggé sarana pikantuk suwarga ingkang ful kanikmatan lan langgeng tanpa winates.

Hadirin  jama’ah Jum’ah ingkang tansah dipunmulyakaken Allah SwT.

Hangginakaken kadonyan kanggé akhérat, tegesipun ngatur bandha lan donyanipun kanggé ngupados ridhanipun Allah Subhanahu wa Ta’ala, sahé lumantar zakat, infaq, lan sodaqoh, saha sadaya ingkang handhatengaken manfa’at dhateng sadaya tiyang.

Undhuh-undhuhanipun tiyang zuhud punika badhé pikantuk kamulyan, inggih punika badhé dipuntrisnani Allah Subhanahu wa Ta’ala lan badhé dipuntrisnani tiyang kathah. Rasulullah shalallahu ‘alaihi wassalam dhawuh:

إِزْهَدْ فِي الدُّنْيَا يُحِبُّكَ اللهُ, وَزْهَدْ فِيْمَا فِيْ اَيْدِ النَّاسِ يُحِبُّكَ.

Tegesipun: “Zuhuda sira ing donya, yekti Allah bakal nrisnani marang sira, lan zuhuda sira marang apa wahé kang didarbèki manungsa, yekti manungsa bakal nrisnani marang sira.” (HR. Ibnu Majah).

Hadirin  jama’ah Jum’ah ingkang tansah dipunmulyakaken Allah SwT.

Pramila sampun titi wancinipun kita hambudidaya lan hangiyataken tékad (azzam) wonten ing manah kita, bilh sadaya bandha  donya kita hanamung kanggé akhérat kita.

Ing wasana, mugi-mugi gesang kita wilujeng wiwit ing alam donya punika, lan wilujeng gesang kita wonten ing akhérat mangké.

Amin, Yaa Rabbal ‘Alamin.

أَقُوْلُ قَوْلِيْ هَذَا وَأَسْتَغْفِرُ اللهَ الْعَظِيْمَ, لِيْ وَلَكُمْ وَلِسَائِرِ الْمُسْلِمِيْنَ وَالْمُسْلِمَاتِ مِنْ كُلِّ ذَنْبٍ فَاسْتَغْفِرُوْهُ, إِنَّهُ هُوَ الْغَفُوْرُ الرَّحِيْمُ.

-=(hms, 131016, 06.35)=-

BANDHA INGKANG BERKAH

السلام عليكم ورحمة الله وبركاته

الْحَمْدُ ِللهِ رَبِّ الْعَالَمِينَ, وَبِهِ نَسْتَعِيْنُ عَلَى أُمُوْرِ الدُّنْيَا وَالدِّيْنِ. أَشْهَدُ أَنْ لاَ إِلهَ إِلاّ اللهُ وَلِيُّ الصَّالِحِينَ, وَأَشْهَدُ أَنَّ مُحَمّدًا خَاتَمُ الأَنْبِيَاءِ وَالْمُرْسَلِيْنَ, اَللَّهُمَّ صَلِّ عَلَى مُحَمَّدٍ وَعَلَى آلِ مُحَمَّدٍ كَمَا صَلَّيْتَ عَلَى إِبْرَاهِيْمَ وَعَلَى آلِ إِبْرَاهِيْمَ، إِنَّكَ حَمِيْدٌ مَجِيْدٌ.

يَا أَيُّهَا الَّذِينَ آمَنُوا اتَّقُوا اللَّهَ حَقَّ تُقَاتِهِ وَلَا تَمُوتُنَّ إِلَّا وَأَنْتُمْ مُسْلِمُونَ.
يَا أَيُّهَا النَّاسُ اتَّقُوا رَبَّكُمُ الَّذِيْ خَلَقَكُمْ مِنْ نَفْسٍ وَاحِدَةٍ وَخَلَقَ مِنْهَا زَوْجَهَا وَبَثَّ مِنْهُمَا رِجَالًا كَثِيرًا وَنِسَاءً وَاتَّقُوا اللَّهَ الَّذِيْ تَسَاءَلُوْنَ بِهِ وَالْأَرْحَامَ إِنَّ اللَّهَ كَانَ عَلَيْكُمْ رَقِيبًا.
يَا أَيُّهَا الَّذِينَ آمَنُوا اتَّقُوا اللَّهَ وَقُوْلُوْا قَوْلًا سَدِيْدًا يُصْلِحْ لَكُمْ أَعْمَالَكُمْ وَيَغْفِرْ لَكُمْ ذُنُوبَكُمْ وَمَنْ يُطِعِ اللَّهَ وَرَسُولَهُ فَقَدْ فَازَ فَوْزًا عَظِيمًا. 

 أَمَّا بَعْدُ: فَإِنَّ أَصْدَقَ الْحَدِيْثِ كِتَابُ اللهِ وَخَيْرَ الْهَدْيِ هَدْيُ مُحَمَّدٍ صَلَى اللهُ عَلَيْهِ وَسَلَّمَ وَشَرَّ اْلأُمُوْرِ مُحْدَثَاتُهَا وَكُلُّ مُحْدَثَةٍ بِدْعَةٌ وَكُلُّ بِدْعَةٍ ضَلاَلَةٌ وَكُلُّ ضَلاَلَةٍ فِيْ النَّارِ.

Ma’asyiral Muslimin Jama’ah Jum’ah rahimakumullah;

Alhamdulillah, puji lan syukur kita aturaken dhumateng Allah Subhanahu wa Ta’ala, Dzat ingkang Nyipta, Ngreksa lan Ngatur dhumateng sadaya alam, kanthi qadrat-Ipun ingkang Maha Agung, ngerèh punapa kémawon dhateng sadaya makhluk wonten ing lumahing bumi lan kureping langit.

Salam lan shalawat mugi tansah lumèbèr dhumateng junjungan lan panutan kita  Nabi Muhammad shalallahu ‘alaihi wassalam, kulawarga lan para shahabatipun, sumrambah dhumateng kita sadaya, amin.

Ma’asyiral Muslimin Jama’ah Jum’ah rahimakumullah;

Tiyang ingkang taqwa punika tansah ngajeng-ajeng bandha ingkang berkah. Bandha ingkang berkah punika ingkang dipunperkoléh  kanthi cara ingkang halal, lajeng dipun resiki (dipunwedalaken zakatipun) saha dipuninfaqaken sapérangan wonten ing sabilillah (merginipun Allah Subhanahu wa Ta’ala).

Allah Subhanahu wa Ta’ala dhawuh:

آمِنُوا بِاللَّهِ وَرَسُولِهِ وَأَنْفِقُوا مِمَّا جَعَلَكُمْ مُسْتَخْلَفِينَ فِيهِ ۖ فَالَّذِينَ آمَنُوا مِنْكُمْ وَأَنْفَقُوا لَهُمْ أَجْرٌ كَبِيرٌ

“Padha imana sira kabèh marang Allah lan Rasul-É lan padha mblanjakna sadhèngah saking bandhanira kabèh kang Allah wus ndadèkaké sira kabèh bisa nguwasani.

Mula wong-wong kang padha iman antarané sira kabèh lan mblajakaké (sadhéngah) saking bandhané, merkoléh ganjaran kang gedhé).” (QS. Al-Hadid [57]:7).

Ayat punika suka paring pitedah dhumateng kita, bilih èstunipun bandha ingkang kita kuwaosi punika kagunganipun Allah Subhanahu wa Ta’ala ingkang dipunkuwaosaken dhumateng kita. Dados, kita punika sanès panguwaos mutlak. Awit saking punika, kita kedah sumadya nginfakaken sapérangan bandha kasasebat.

Ma’asyiral Muslimin Jama’ah Jum’ah rahimakumullah;

Tiyang muslim sejati temtu rumaos bombong manahipun manawi saged ngedalaken zakat, ingfaq, lan shodaqah. Manahipun boten hanggadhahi raos awrat babarpisan, lan malah hanggadhahi kapitadosan bilih zakat, infaq, lan shadaqah punika boten ngirangi bandhanipun. Muslim sejati pitados sanget kaliyan dhawuhipun Rasulullah shalallahu ‘alaihi wa salam ingkang ungelipun makaten:

عَنْ أَبِيْ هُرَيْرَةَ أَنَّ رَسُوْلَ اللهِ صَلَّى اللهُ عَلَيْهِ وَالسَّلاَمَ قَالَ : مَا نَقَصَتْ صَدَقَةٌ مِنْ مَالٍ, وَمَا زَادَ اللهُ عَبْدًا بِعَفْوٍ إِلاَّ عِزًّا, وَمَا تَوَضَعَ أَحَدٌا لِلَّهِ إِلاَّ رَفَعَهُ اللهُ. (رواه الديلمي).  

Tegesipun: Hadits saka Abu Hurairah ra., Rasulullah shallahu ‘alaihi wassalam ngendika: “Ora bakal suda bandha iku amarga sedhekah. Lan Allah ora bakal nambahi tumrap wong kang mènèhi pangapura kajaba kamulyan, lan ora kalorot drajaté sawijinging wong kang andhap asor (tawadlu’) karana Allah iku kajaba Allah bakal ngangkat derajaté.” (HR. Daélami).

Ma’asyiral Muslimin Jama’ah Jum’ah rahimakumullah;

Bandha punika boten badhé suda jalaran zakat, infaq, lan shodaqah, amargi zakat, infaq, lan shadaqah punika hakekatipun bandha ingkang dipunampilaken dhumateng  Allah Subhanahu wa Ta’ala. Lan Allah Subhanahu wa Ta’ala bandhé mangsulaken kanthi matikel-tikel sahé wonten ing alam donya lan ugi wonten ing alam akhirat.

Allah Subhanahu wa Ta’ala dhawuh woten ing Al-Qur’an Al-Karim:

مَنْ ذَا الَّذِي يُقْرِضُ اللَّهَ قَرْضًا حَسَنًا فَيُضَاعِفَهُ لَهُ أَضْعَافًا كَثِيرَةً ۚ وَاللَّهُ يَقْبِضُ وَيَبْسُطُ وَإِلَيْهِ تُرْجَعُونَ

“Sapa wongé kang gelem ngutangi Allah, kelawan piutang kang bagus (nafkahaké bandhané ing dalané Allah), mangka Allah nikelaké  piwalesé marang dhèwèké kelawan tikelan kang banget akèhé. Lan Allah iku ngrupekaké lan jembaraké (rizki), lan namung marang Allah sira kabèh dibalèkaké.” (QS. Al-Baqarah [2]:245).

Allah Subhanahu wa Ta’ala punika Dzat ingkang nguwaosi rizki ingkang sajatosipun. Lan Allah Subhanahu wa Ta’ala punika ingkang maringi rizki dhumateng sadaya makhluq-Ipun kalebet kewan ingkang gegremetan.

Allah Subhanahu wa Ta’ala dhawuh:

وَمَا مِنْ دَابَّةٍ فِي الْأَرْضِ إِلَّا عَلَى اللَّهِ رِزْقُهَا وَيَعْلَمُ مُسْتَقَرَّهَا وَمُسْتَوْدَعَهَا ۚ كُلٌّ فِي كِتَابٍ مُبِينٍ

“Lan ora ana satokéwan kang gumremet ana ing lumahé bumi kajaba Gusti Allah kang nanggung zizkiné. Lan Panjenengané (Gusti Allah) pirsa marang panggonan nenepé kéwan iku lan disimpené. Sakabèhé katulis ana ing Kitab kang nyata (Lauh Mahfudz).” (QS. Hud [11]: 6).

Tiyang muslim sejati boten badhé purun dipunhasut lan dipun-godha déning  syétan. Syétan pancèn tansah hanggodha lan hambujuk supados dados tiyang pelit (bakhil) ingkang boten purun bayar lan ngedalaken zakat, infaq, lan shadaqah. Syètan ugi ngajrih-ajrihi tiyang bilih zakat, infaq, lan shadaqah punika badhé dados tiyang miskin.

Allah Subhanahu wa Ta’ala dhawuh:

الشَّيْطَانُ يَعِدُكُمُ الْفَقْرَ وَيَأْمُرُكُمْ بِالْفَحْشَاءِ ۖ وَاللَّهُ يَعِدُكُمْ مَغْفِرَةً مِنْهُ وَفَضْلًا ۗ وَاللَّهُ وَاسِعٌ عَلِيمٌ .

“Syétan njanjèkaké (medèn-medèni) sira kabèh kanthi kamiskinan lan préntah marang sira kabèh tumindak jahat (medhit), sedheng Allah njanjèkaké kanggo sira kabèh pangapura saka Panjenengané lan kanugrahan. Lan Allah iku Maha Jembar (kanugrahan-É) tur Maha Mirsani.” (QS. Al-Baqarah [2]: 268).

Ma’asyiral Muslimin Jama’ah Jum’ah rahimakumullah;

Mugi-mugi kita sadaya dados tiyang muslim ingkang dipunridlai Allah Subhanahu wa Ta’ala anggèn kita pados rizki lan hangginakaken bandha. Remen lan ikhlas ngedalaken zakat, infaq, lan shodaqah. Lan mugi-mugi bandha kita kalebet bandha ingkang berkah. Amin Yaa Rabbal ‘Alamin.

بَارَكَ اللهُ لِيْ وَلَكُمْ فِى الْقُرْآنِ الْكَرِيْمِ, وَنَفَعَنِيْ وَاِيَّاكُمْ بِمَا فِيْهِ مِنَ اْلاَيَاتِ وَالذِّكْرِ الْحَكِيْمِ,

 وَتَقَبَّلَ مِنِّيْ وَمِنْكُمْ تِلاَوَتَهُ إِنَّهُ هُوَ الْسَّمِيْعُ الْعَلِيْمُ.

-=(hms, 160616, 10.20)=-

TRISNA DHUMATENG ALLAH SUBHANAHU WA TA'ALA

السلام عليكم ورحمة الله وبركاته

إِنّ الْحَمْدَ ِللهِ, نَحْمَدُهُ وَنَسْتَعِيْنُهُ وَنَسْتَغْفِرُهُ وَنَعُوْذُ بِاللهِ مِنْ شُرُوْرِ أَنْفُسِنَا وَسَيّئَاتِ أَعْمَالِنَا, مَنْ يَهْدِهِ اللهُ فَلاَ مُضِلّ لَهُ وَمَنْ يُضْلِلْ فَلاَ هَادِيَ لَهُ. أَشْهَدُ أَنْ لاَ إِلهَ إِلاّ اللهُ وَأَشْهَدُ أَنّ مُحَمّدًا عَبْدُهُ وَرَسُوْلُهُ. اَللهُمّ صَلّ وَسَلّمْ عَلى مُحَمّدٍ وَعَلى آلِهِ وِأَصْحَابِهِ وَمَنْ تَبِعَهُمْ بِإِحْسَانٍ إِلَى يَوْمِ الدّيْن. قَالَ اللهُ تَعَالَى فِي الْقُرْآنِ الْكَرْمِ:

يَاأَيّهَا الّذَيْنَ آمَنُوْا اتّقُوا اللهَ حَقّ تُقَاتِهِ وَلاَ تَمُوْتُنّ إِلاّ وَأَنْتُمْ مُسْلِمُوْنَ.

Hadirin Jama’ah Jum’ah ingkang dipunmulyakaken Allah SwT.

Puji syukur tansah kita aturaken  dhumateng Allah Subhanahu wa Ta’ala ingkang mirsani sadaya ingkang kasat mripat lan ingkang ghaib, boten wonten ingkang  lepas saking pamirsanipun Allah Subhanahu wa Ta’ala dhateng sadaya ingkang badhé dipunlampahi lan ingkang sampun dipunlampahi sadaya makhluk-Ipun.

Kalebet wujud syukur kita dhumateng Allah Subhanahu wa Ta’ala punika sumangga kita nambahi kualitas iman lan taqwa kita dhumateng Allah Subhanahu wa Ta’ala kanthi taqwa ingkang saleres-leresipun wonten ing sadhéngah papan lan kawontenan punapa kémawon.

Shalawat lan salam kita aturaken dhumateng junjungan kita Rasulullah shalallahu ‘alaihi wa salam ingkang sampun maringi tuntunan gesang, lan tuladha ingkang sahé dhumateng sadaya umat.

Hadirin Jama’ah Ju’mah ingkang dipunmulyakaken Allah SwT.

Wonten ing panggesangan punika, tiyang boten badhé pikantuk kasampurnan gesang tanpa raos trisna. Raos trisna punika mujudaken panyemangat tumrap tiyang ingkang badhé nyuprih lan pikantuk punapa ingkang dipuntrisnani. Lan wonten panggènan punika tiyang saged katingal èdi lan pèni saha hanengsemaken, kados dhawuhipun Allah Subhanahu wa Ta’ala:

زُيِّنَ لِلنَّاسِ حُبُّ الشَّهَوَاتِ مِنَ النِّسَاءِ وَالْبَنِينَ وَالْقَنَاطِيرِ الْمُقَنْطَرَةِ مِنَ الذَّهَبِ وَالْفِضَّةِ وَالْخَيْلِ الْمُسَوَّمَةِ وَالْأَنْعَامِ وَالْحَرْثِ ۗ ذَٰلِكَ مَتَاعُ الْحَيَاةِ الدُّنْيَا ۖ وَاللَّهُ عِنْدَهُ حُسْنُ الْمَآبِ

“Manungsa iku tansah pinahèsan déning rasa seneng marang pirang-pirang kasenengan, hiya iku; wanita-wanita, anak, bandha donya kang akèh, kang saka jinisé emas, pérak, jaran pinilih, raja kaya, lan sawah pategalan.

Hiya kang kaya mengkono iku (wujudé) kasenengan urip ana ing donya. Lan ing ngersané Allah ana papan panggonan bali kang bagus (suwarga)”. (QS. Ali Imran [3]:14).

Kados limrahipun tiyang, pramila tiyang Muslim inggih ugi hanggadhahi raos trisna ingkang handadosaken purun nyambut damel lan makarya kanthi semangat lan saèstu. Hananging raos trisna ingkang dipuntuju  tiyang Muslim punika hanamung dhumateng  Allah Subhanahu wa Ta’ala kéwala.

Allah Subhanahu wa Ta’ala dhawuh wonten ing Al-Qur’an Al-Karim:

وَمِنَ النَّاسِ مَنْ يَتَّخِذُ مِنْ دُونِ اللَّهِ أَنْدَادًا يُحِبُّونَهُمْ كَحُبِّ اللَّهِ ۖ

“Lan sadhéngah saking manungsa iku ana kang gawé sesembahan saliyané Allah; dhèwèké padha seneng marang sesembahané kaya senengé marang Allah … .” (QS. Al-Baqarah [2]:165).

Hadirin Jama’ah Ju’mah ingkang dipunmulyakaken Allah SwT.

Trisna dhumateng Allah Subhanahu wa Ta’ala lan Rasul-Ipun punika dados kuwajibanipun saben-saben tiyang Islam (Muslim). Trisna dhumateng Allah Subhanahu wa Ta’ala lan Rasul-Ipun punika minangka pepaès ingkang sanget édi lan pèni menggah dhiri pribadhinipun, minangka raos ingkang nuntun pribadhinipun manembah kanthi cara ingkang leres dhumateng Allah Subhanahu wa Ta’ala.

Kados dhawuhipun  Allah Subhanahu wa Ta’ala:

قُلْ إِنْ كُنْتُمْ تُحِبُّونَ اللَّهَ فَاتَّبِعُونِي يُحْبِبْكُمُ اللَّهُ وَيَغْفِرْ لَكُمْ ذُنُوبَكُمْ ۗ

 وَاللَّهُ غَفُورٌ رَحِيمٌ

“Dhawuha sira!, “kalamun sira kabèh iku (bener-bener) seneng marang Allah, padha manuta sira kabèh marang Ingsun, mesthi Allah nrisnani lan ngapura dosa-dosanira kabèh. Allah iku Maha Ngapura lan Maha Welas”. (QS. Ali Imran [3]:31).

Hadirin Jama’ah Ju’mah ingkang dipunmulyakaken Allah SwT.

Ayat kasebat nedahaken bilih tandha lan tengeripun trisna dhumateng Allah Subhanahu wa Ta’ala punika ndhèrèk punapa ingkang dipundhawuhaken lan nilar sadaya awisanipun. Awit saking punika, sinten kémawon ingkang rumaos hanggadhahi raos trisna dhumateng Allah Subhanahu wa Ta’ala, hananging boten manut lan mituhu dhateng sadaya syari’atipun, boten hanuladha lan nyonto panjenenganipun, pramila tiyang kasebat  kalebet tiyang ingkang nggorohaken dhateng kapitadosanipun.

Ayat kasebat (QS. Ali Imran [3]: 31) ugi martélakaken bilih faédah lan manfaatipun trisna dhumateng Allah Subhanahu wa Ta’ala lan Rasul-Ipun punika badhé pikantuk maghfirah (ampunan) lan badhé dipuntrisnani Allah Subhanahu wa Ta’ala.

Lan inggih tiyang punika ingkang sampun hasil nyuprih trisna dhumateng Allah Subhanahu wa Ta’ala, jalaran manawi Allah Subhanahu wa Ta’ala sampun nrisnani kawulanIpun, pramila Allah Subhanahu wa Ta’ala badhé dhawuh dhumateng sadaya makhluk-Ipun supados hanrisnani dhateng tiyang kasebat.

Hadirin Jama’ah Ju’mah ingkang dipunmulyakaken Allah SwT.

Kanthi cetha lan terwaca bilih trisna lan ngagungaken Rasulullah shalallahu ‘alaihi wa salam punika minangka bukti lan tandhanipun trisna kita dhumateng Allah Subhanahu wa Ta’ala ingkang kanthi saleresipun.

Hanuladha  lan handhèrèk pitedah lan sunnahipun Rasulullah shalallahu ‘alaihi wa salam punika kalebet satunggalipun kuwajiban saben-saben tiyang Islam (Muslim).

Lan kalebet boten trisna saha ngagungaken Rasulullah shalallahu ‘alaihi wa salam manawi nindakaken pandamelan lan ngibadah ingkang boten dipuncontohaken déning Rasulullah shalallahu ‘alaihi wa salam.

Hadirin Jama’ah Ju’mah ingkang dipunmulyakaken Allah SwT.

Awit saking punika sumangga kita hambudidaya lan handedonga dhumateng Allah Subhanahu wa Ta’ala, mugi-mugi kita dipunteguhaken lan dipunmantepaken raos trisna kita dhumateng Allah Subhanahu wa Ta’ala, saha saged nuwuhaken raos trisna ingkang hakiki.

Amin Yaa Rabbal ‘Alamin.

بَارَكَ اللهُ لِيْ وَلَكُمْ فِي الْقُرْآنِ الْعَظِيْمِ، وَنَفَعَنِيْ وَإِيَّاكُمْ بِمَا فِيْهِ مِنَ اْلآيَاتِ وَالذِّكْرِ الْحَكِيْمِ.

 أَقُوْلُ قَوْلِيْ هَذَا وَأَسْتَغْفِرُ اللهَ الْعَظِيْمَ لِيْ وَلَكُمْ وَلِسَائِرِ الْمُسْلِمِيْنَ وَالْمُسْلِمَاتِ

 فَاسْتَغْفِرُوْهُ إِنّهُ هُوَ الْغَفُوْرُ الرّحِيْمِ

-=(hms, 280916, 12.26)=-